- Որպես բազմափորձ գործիչ, ինչպե՞ս կարող եք բնութագրել նախընտրական զարգացումները: Ինչո՞վ են դրանք տարբերվում նախորդներից, ո՞րն է ներկա ժամանակահատ վածի յուրահատկությունը:
- Այս ընտրություններում ստորջրյա խութեր կան, որոնց մասին իրազեկ մարդիկ, ըստ երևույթին, խոսել չեն կամենում: Մյուսները պարզապես չեն պատկերացնում: Դա կար նաև նախորդ խորհրդարանական ընտրություններում, բայց այն ժամանակ մի գործիչ կարողացավ վնասազերծել այդ խութերը: Հիմա դրանք կրկին դրսևորվում են: Նպատակն իրավիճակի տեր նավը ստորջրյա խութերին խփելով` շարքից հանելն է և նրա փոխարեն մեկ այլ նավ դրության տեր դարձնելն է: Ամեն ինչ այնքան պարզ ու հստակ չէ, որքան կարող է թվալ առաջին հայացքից: Եթե Սերժ Սարգսյանն ասում է, որ պետք է ինքը օլիգարխների ճանապարհը փակի` շատ տխուր է, երբ որևէ իշխանավոր է ուզում ինչ-որ արմատական բան անել: Դա պետք է օրենքն աներ: Սահմանադրության տրամաբանության մեջ այդ միտքը կա, երբ ասվում է, որ պատգամավորը բացի խորհրդարանից, ուրիշ տեղ աշխատելու իրավունք չունի: Եվ եթե անցյալում դա չի եղել, ու հիմա Նախագահի ճիգերով պետք է արվի, դա արդեն ցույց է տալիս, որ մենք ապրում ենք քաղաքական արատավոր պայմաններում: Այսօր ասպարեզում գաղափարախոսական ուժեր չկան: Իշխանության ձգտելու ճանապարհին հիմնականում քննարկվում են ընկերային և կենցաղային խնդիրներ:
- Ի՞նչ եք կարծում, այսօր կա՞ իշխանություն-ընդդիմություն իրական պայքար, թե՞ պարզապես առկա է ներիշխանական վերադասավորումների գործընթաց:
- Ճիշտ ասացիք. երկրորդ մասն ավելի ակնհայտ է: Ինչ վերաբերում է ընդդիմություն-իշխանություն պայքարին, ես այն իրոք պայքար կհամարեի` եթե լինեին գաղափարախո սական կամ գոնե արմատական ծրագրային հակադրություններ: Բայց որպես ընդդիմություն ներկայացող ուժերի զգալի մասն ուղղակի սպասում է, թե ինչ առաջարկ կստանա, իսկ մյուս մասը մտածում է, որ մի քանի տեղ էլ ինքը կստանա:
- Չգիտեմ` որտեղից և ինչու, բայց տպավորություն կա, որ այս ընտրություններին կմասնակցի նաև Պարույր Հայրիկյանը:
- Այդ տպավորությունը հիմնված է վերջին տեղեկատվության վրա. երկու ասուլիսներում ես հայտարարեցի, որ չնայած դեմ եմ այսպիսի միջոցառումներին մասնակցելուն, բայց ԱԻՄ ներկայացուցչական խորհուրդն ասել է, որ պետք է մասնակցել ընտրություններին: ԱԻՄ-ը նախընտրելի է համարում հանուն կատարյալ ժողովրդավարության` մեծ դաշինքով գնալ ընտրությունների: Բայց քանի որ դաշինքը չկայացավ ասպարեզում հայտնված հիմնական քաղաքական ուժերի եսակենտրոն նկատառումների պատճառով, որոշվեց, որ մենք գնալու ենք ինքնուրույն: Քաղաքական ուժերը պատշաճ մակարդակով չընկալեցին կատարյալ ժողովրդավարական համակարգի համար համախմբվելու մեր կոչը: Դրա վկայութ յունն այն է, որ վերջերս «Ժառանգությունը» և ՀՅԴ-ն ասպարեզ իջան ամբողջապես համամասնականի անցնելու առաջարկով: Բայց իրենք առաջնորդվում են նաև նախընտրական տրամադրություններով, որոնցում ազգային ընդհանրական շահը չէ կարևորը, այլ ասպարեզում ավելի շատ երևալը, մի երկու տեղ ավել ստանալը: Եթե այսօր դու կարևոր հարցով ասպարեզ ես իջնում, պետք է պատվես ծնողներիդ: Ժողովրդավարության հարցում Հայաստանում ծնողը ԱԻՄ-ն է: ԱԻՄ-ի նմանատիպ նախաձեռնությանը վեց կազմակերպություն միացել էին. եթե քեզնից առաջ նույն գաղափարի շուրջ վեց կազմակերպություն համախմբվել են, նրանք այդ հարցում ծնողի կարգավիճակ ունեն...
- Դա՞ էր պատճառը, որ երբ ԱԺ-ում լսումների ժամանակ ասացին, որ այս հարցում կա կոնսենսուս մինուս մեկ, դուք տեղից ձայնեցիք` մինուս երկու:
- Այո: Բայց նկատի չունեի, թե դեմ եմ: Այլ ասացի, որ ավելի լավը կա, դուք միջին ճանապարհին եք կանգնում, իսկ մենք առաջարկում ենք ամբողջական մի բան: Իրենք դա շատ լավ գիտեին:
- Լուրեր են շրջանառվում, որ Դուք ընտրություններին կմասնակցեք` սերտորեն համագործակցելով Հանրապետականի հետ:
- Կարող ենք շատ սերտ համագործակցել բոլորի հետ: Բայց մենք ունենք խնդիրներ, որոնց մասին ոչ միայն խոսել ենք, այլ այդ ուղղությամբ աշխատանքներ ենք տանում արդեն մի քանի տարի: Օրինակ`. ազգային միասնության ապահովումը` հոգևոր և մտավոր մակարդակով, Հայաստանը հայ ժողովրդի սեփականություն դարձնելը, արտաքին քաղաքականության մեջ` համայն մարդկության խնդիրը դարձնել ցեղասպանության հետևանքների վերացումը: Եթե այս հարցերում համախոհներ ունենանք, նրանց հետ կաշխատենք:
- Ավելի կոնկրետացնեմ հարցս. չի՞ բացառվում, որ Ձեզ տեսնենք Հանրապետականի համամասնական ցուցակում:
- Եթե ԱԻՄ-ն ազդարարում է, որ ինքնուրույն ենք գնում ընտրությունների, ինչպե՞ս կարող է այդ մասին խոսք լինել:
- Այսօր արդեն բարձրաձայնում են այն մասին, որ որոշ կուսակցություններ պայմանավորվածություններ են ձեռք բերում աղանդավորական կազմակերպությունների ղեկավարների հետ: Որոշակի վարձատրության դիմաց վերջիններս ընտրությունների ընթացքում իրենց հետևորդներին ուղղորդելու են ըստ անհրաժեշտության:
- Լսել եմ, բայց ունեցածս տեղեկատվությունը բավարար չի դրա մասին վճռական խոսք ասելու համար: Կուսակցությունները համակիրներ որոնելու ճանապարհին սահմանափակված չեն: Նրանց քարոզչությունը վերաբերվում է Հայաստանի քաղաքացիներին, նույնիսկ, եթե վերջիններն աղանդավոր են կամ էթնիկական տարբեր խմբեր են կազմում:
- Բայց գիտենք` աղանդները ղեկավարվում են դրսի ուժերի հատուկ ծառայությունների կողմից:
- Եթե այդ դրսևորումները կհակասեն մեր օրենսդրությանը` այդտեղ պետք է գործեն դատախազությունը, իրավապահները:
- Որպես մեր զրույցի վերջաբան` ի՞նչ է հուշում Ձեր քաղաքական փորձը. նոր խորհրդարանում ԱԻՄ-ին կտեսնե՞նք:
- Զարմանալի բան պիտի ասեմ, բայց քանի որ ի սկզբանե եղել եմ ինքնորոշման կողմնակից, այսօր նույն դիրքերում մնալով, ասում եմ` խոսքն այնքան մեզ չի վերաբերում, որքան մեր ժողովրդին: Մեր ժողովրդի ինչ-որ հատված պիտի որոշի, որ մենք մասնակցենք: Այդ պատճառով, այս պահին մենք հետևոմ ենք արձագանքներին: Բավարար և առարկայական արձագանքների դեպքում մենք պարտավոր կլինենք մասնակցել ընտրություններին, անկախ` նրանց որակից:
