ՀՀ զինված ուժերը ծանր կորուստ կրեցին

Ս.թ. հունվարի 19-ին, կյանքի 59-րդ տարում մեզանից վաղաժամ հեռացավ ՀՀ ՊՆ հակաօդային պաշտպանության զորքերի պետ, ՀՕՊ վարչության պետ, գեներալ-մայոր Արարատ Խաչիկի Համբարյանը: Արարատ Համբարյանը ծնվել է 1950թ. սեպտեմբերի 16-ին` Չինաստանի Ժողովրդա-դեմոկրատական Հանրապետությունում, 1973թ. ավարտել է Մինսկի բարձրագույն ինժեներական զենիթա- հրթիռային զինվորական ուսումնարանը, 1981-ին` ԽՍՀՄ ՀՕՊ ռազմական ակադեմիան, իսկ 1990թ.-ին` ԽՍՀՄ ԶՈւ ԳՇ ռազմական ակադեմիան: 1967-1992թթ. ծառայել է ԽՍՀՄ զինված ուժերում, 1992-1998թթ.` ՌԴ զինված ուժերում` զբաղեցնելով մի շարք պատասխանատու պաշտոններ: 1998թ.-ից Արարատ Համբարյանը ծառայում է ՀՀ զինված ուժերում: 2003թ. ՀՀ Նախագահի հրամանագրով նրան շնորհվել է «գեներալ-մայոր» զինվորական կոչում: Մեծ է գեներալ Ա.Համբարյանի ներդրումը ՀՀ զինված ուժերում ՀՕՊ համակարգի մակարդակի բարձրացման, երիտասարդ մասնագետների մասնագիտական պատրաստության և զինված ուժերի կայացման ու կատարելագործման գործում: Ա.Համբարյանը պարգևատրվել է «Մարտական ծառայություն», «Մարտական ընկերակցության ամրապնդման համար», «Հայրենիքին մատուցած ծառայությունների համար» 2-րդ աստիճանի, «Մարշալ Բաղրամյան», «Համագործակցության ամրապնդման համար» պետական և գերատեսչական մեդալներով, ինչպես նաև ԽՍՀՄ մեդալներով և շքանշաններով: Բազմիցս խրախուսվել է շնորհակալագրերով ու պատվոգրերով: Արարատ Համբարյանի գործն ու անունը միշտ վառ կմնա մեր հուշերում: Հանգուցյալին մտերիմներն ու ընկերները վերջին հրաժեշտը տվեցին երեկ` Գ. Սունդուկյանի անվան պետական ակադեմիական թատրոնում: ՀՀ ՊԱՇՏՊԱՆՈՒԹՅԱՆ ՆԱԽԱՐԱՐՈՒԹՅՈՒՆ