Երբ հաճախորդն անտեղյակ է «թեժ» համարներից


Բանկերում սպասարկման բարելավմանն, անխոս, կարող է անդրադառնալ ինքնապատասխանիչների հիմնավոր ծրագրավորումը: Սակայն «Յունիբանկում» այնպես են ծրագրավորում, որ հաճախ անշունչ այդ «արարածներն» օգնելու փոխարեն սղոցում են հաճախորդների նյարդերը: Տողերիս հեղինակն օրերս Մոսկվայից առաքված գումարը ստանալու համար ԱրմենՏելից հաղորդած հեռախոսահամարներով փորձեց պարզել, թե որտե՞ղ է գտնվում բանկի «Կենտրոն» մասնաճյուղը և ո՞ր ժամին կարելի է լինել այստեղ` ստանալու դրամը: Սակայն բազմաթիվ զանգերիս ի պատասխան, ինքնապատաս խանիչը նախ անգլերեն ու հայերեն իրազեկում էր, թե որ բանկն եմ զանգահարել, ապա «խոստանում» կապ օպերատորի հետ… Սակայն կարճ լռությունից հետո կապը խզվում էր: Փորձեցի դիմել նույն բանկի մյուս մասնաճյուղի օգնությանը` դրա համար հավաքելով մասնաճյուղերի հեռախոսահամարները և կրկին չստանալով պատասխանները: Եվ այդպես, 4-5 ժամ: Վերջում պատահականորեն «Տերյան» մասնաճյուղի հեռախոսահամարով տեղեկացա, որ գումարը ստանալու եմ այստեղ: Մեր այն հարցին, թե ինչո՞ւ ինքնապատասխանիչները հստակ պատասխան չեն տալիս հաճախորդներին, բանկի սպասարկման փոխտնօրեն Վարդան Աղաջանյանը նկատեց. - ԱրմենՏելի տեղեկատուից ստացված ձեր հավաքած հեռախոսահամարներով հնարավոր չէ ստանալ հուզող հարցերի պատասխանները: Պետք է օգտվեիք մեր թեժ համարներից, որոնք կարելի է իմանալ «Սփյուռ»-ից: Այդ մասին մենք հայտարարել ենք տարբեր լրատվամիջոցներով: Սակայն տասնյակ մարդկանց հետ կատարած հարցումներից պարզվեց, որ մարդիկ անտեղյակ են նման հայտարարություններից, անտեղյակ են «թեժ» համարներից: ԱրմենՏելը և մյուս հեռախոսային տեղեկատու ծառայությունները տրամադրում են սովորական հեռախոսահամարներ: Եթե ոչ «Յունիբանկը», ուրիշ ով պիտի պարզի, թե ինչո՞ւ հեռախոսային տեղեկատուները հաճախորդներին անհասկանալիորեն տրամադրում են մոլորեցնող հեռախոսահամարներ: Եվ վերջապես բանկի հաճախորդը ի՞նչ իմանա, թե ո՞ր լրատվամիջոցներով է «Յունիբանկը» հրապարակում իր տեղեկությունները:

Արամայիս ՂԱԶԱՐՅԱՆ