ՀԱՅՏՆԱԲԵՐՎԵԼ ԵՆ ՄԻ ՇԱՐՔ ԹԵՐՈՒԹՅՈՒՆՆԵՐ
Երեք օր առաջ Հայաստանի Կրթության և գիտության նախարարությունում տեղի ունեցած աշխատանքային խորհրդակցությունը վարել է աշխատակազմի ղեկավար Մհեր Ղազարյանը: Ներկայացված զեկույցի համաձայն` Լոռու մարզի դպրոցներում կատարված ուսումնասիրությունների ընթացքում արձանագրված թերացումները վերաբերել են դպրոցական ուսումնական պլանների կազմմանը, ուսուցիչների մրցութային կարգով ընտրությանը և այլ հարցերի: Մասնավորապես, մարզի հեռավոր և սահմանամերձ գյուղերում առկա է մանկավարժ մասնագետների պակաս, ինչով պայմանավորված` ուսուցչի թափուր տեղերի համար հայտարարված մրցույթները մի շարք դեպքերում հավակնորդների բացակայության պատճառով չեն կայանում: Խորհրդակցության արդյունքում առաջարկվել է ՀՀ ԿԳՆ կրթության պետական տեսչության հանձնարարականների ու եզրակացության հիման վրա ձեռնարկել օրենքով նախատեսված համապատասխան միջոցներ: Ինչ վերաբերում է կադրերի պակասին, հարկ է միայն հաշվել, թե քանի˜ դիպլոմավոր մասնագետներ աշխատանք չեն գտնում: Դրա փորձը կա. հեռավոր և սահմանամերձ գյուղերում աշխատելու համար հատուկ պայմանագրով մասնագետներ պատրաստելը մի՞թե դժվար է:
