Ձեր բարի հետքն անանց է, Նահապե´տ
ԵՐՎԱՆԴ ՄԱՆԱՐՅԱՆ. ՀՀ արվեստի վաստակավոր գործիչ, «Ագուլիս» տիկնիկային թատրոնի հիմնադիր, գեղարվեստական ղեկավար
Համաշխարհային 2-րդ պատերազմից հետո հայերի առաջին խումբը` 9 տղա, 2 աղջիկ, որ Սփյուռքից ուղևորվեց Հայաստան, պարսկահայ երիտասարդների մեր խումբն էր` ես, Աբիգ Ավագյանը, Հովհաննես Բադալյանը, Հրայր Մովսիսյանը և ուրիշներ: Լուսաբացին առաջին անգամ Արարատը տեսանք, երբ դուրս էինք գալիս Նախիջևանից: Առաջինը գնացքից ես իջա հայկական հողի վրա... 1946 թվականի մայիսի 13-ն էր: Անպատմելի զգացողություններ է արթնացնում ամեն բան, որ առաջին անգամ է կատարվում: Եվ երբեք, երբեք չի մոռացվում, չի փոշոտվում հուշերի գզրոցում: Անմոռաց մնաց նաև Հայաստանի գրողների ու արվեստագետների հետ մեր խմբի առաջին հանդիպումը մեր ժամանումից մի քանի օր անց: Երանության ժպիտով եմ միշտ մտաբերում, թե ինչպիսի անմիջականությամբ մեզ` հայրենադարձության ավանգարդիստներիս, մոտեցան «Ավանգարդի» աշխատակիցները: Մտերմիկ զրույց ունեցանք, խմբագրակազմի հետ մեր լուսանկարը տպագրվեց թերթում...
Ես սա մեծ հուզմունքով եմ վերապրում, որովհետև հայ մարդու համար հայրենիք ունենալու գաղափարն ընտանիքում սերնդից սերունդ է անցել: Բոլոր դրսում ապրողներս անհամբեր էինք, թե երբ ենք վերջապես ոտք դնելու սրբազան հողի վրա: Թեև ասեմ, մենք որպես ուսանողներ ավելի վաղ եկանք, ներգաղթի պաշտոնական կազմակերպությունից էլ առաջ: Հետո հպատակության հարցն էլ կարգավորվեց: Յուրաքանչյուրիս ճակատագիրը ընթացավ ըստ սեփական նախասիրության, կամքի: Տարբեր մասնագիտություններ ընտրեցինք` պատմաբան, բժիշկ, լեզվաբան, արվեստագետ..., բարձրագույն կրթություն ստացանք: Ինքս, լինելով թատերական գերդաստանից (ծնողներս երկուսն էլ դերասաններ էին), նվիրվեցի թատրոնին: Ուսանեցի, աշխատեցի, անցա վաստակած թոշակի ու ստեղծեցի «Ագուլիս» թատրոնը, ամենափոքրերի համար: Ենթադրում եմ, որ վաղնջական նախնիներս բամբիռ նվագողներ են եղել, որոնց միշտ հալածել է եկեղեցին, քանի որ հայրական արմատներս Գողթան գավառում են մխրճված: Առհասարակ թատրոնը մեր հասարակության համար ճակատագրականի աստիճան կարևոր երևույթ է, որովհետև մեր ժողովուրդը թատերական իրականության հետ կապված է եղել քրիստոնեությունն ընդունելուց բավական առաջ: Նոր հարաբերությունների շրջանում, ցավոք, բավական դժվար է ապրում թատրոնը: Մինչդեռ հանրության գեղարվեստական թևի առաջնորդը թատրոնն է: Այսօրվա Սունդուկյանի անվան թատրոնը ամենևին էլ 30 տարի առաջվանը չէ: Ինչու՞: Այդ «ինչու»-ով պետք է լրջորեն մտահոգվենք, եթե կամենում ենք, որ նոր սերունդը մեր հնամենի մշակույթի արժանվույն գնահատողն ու կրողը լինի: Զարմանալիորեն երկատված ենք այժմ ավելի, քան երբևէ: Մենք մեր մեջ կրում ենք հայությունը, միաժամանակ անհամատեղելի հակոտնյան` ազգային ինքնության արմատավորման համար ոչինչ չենք անում, խարդախում ենք, թալանում, լքում հայրենիքը...
Թե որպես մասնագետ, թե որպես մարդ կայացել եմ Խորհրդային երկրում, որն, ավաղ, փլուզվեց, որովհետև հասարակական համակարգ սողոսկած փտախտի հարուցիչների դեմ պայքարող իրական ընդդիմություն չուներ: Այդուհանդերձ, հպարտությամբ պիտի ասեմ` մեր սերնդի խորհրդային դաստիարակությունն էր, որ Արցախն ազատագրեց: Եվ ահա արդեն անցել է ավելի քան կես դար, ցավոք սրտի, 11-ից միայն ես կարող եմ այսօր ձեզ հետ կենդանի զրույց վարել: Սակայն նրանց բոլորի հետքը մնացել է այս հողի վրա, որովհետև զարմանալի նվիրվածությամբ հաստատվեցին Հայաստանում, աշխատեցին հանուն հայրենիքի բարգավաճման: Ինքս ժամանակին թողեցի Տիկնիկայինում գլխավոր ռեժիսորի պաշտոնը և հեռավոր Գորիս մեկնեցի, որտեղ նաև դերասան էի: Սահմանամերձ գոտու բարեկրթությանը, ուստի և անվտանգությանը մենք նպաստում էինք գյուղերում հաճախակի ներկայացումներ խաղալով: Բեմն ընդամենը 1 սեղան և 2 աթոռ էր ունենում` ցանկացած ներկայացման համար, բայց գեղջուկները ծանր աշխատանքից հետո, թող որ ոչ թե ժամը 19.00, այլ մոտավորապես 22.00 հավաքվում էին ակումբներում, սրտաբաց ընդունում մեր «Պատվի համարն» ու «Ֆիլումենա Մարտուրանոն»...
Առ այսօր մեծ նվիրումով գործում եմ թատերական ասպարեզում: Հոգիս փառավորվում է, երբ տեսնում եմ, թե ինչպես թոռնիկս` Հայկը, թատրոն կառույցը պահպանելուն նպաստավոր որոշակի կազմակերպչական ունակություններ է դրսևորում: Արդար վաստակիս պտուղների վայելքն եմ ապրում, երբ տեսնում եմ, թե ինչպես «Ագուլիսի» ուսանողներից շատերն արդեն թատրոն են գալիս իրենց երեխաներով` հավատ ներշնչելով, որ հայրենադարձության առաջին քայլերը կատարածներիս նվիրումը հայրենի մշակույթին անպայման իր բարի հետքը կթողնի նրա հնամենի պատմության էջերում որպես նորովի վերաբերմունք հայրենիքի հանդեպ: