Ձեր թատրոն-օջախը թող միշտ վառ մնա, ազգային Ռահվիրա
ԵՐՎԱՆԴ ՂԱԶԱՆՉՅԱՆ. ՀՀ ժողովրդական արտիստ, Երևանի Հակոբ Պարոնյանի անվան երաժշտական կոմեդիայի թատրոնի գեղարվեստական ղեկավար
Իր ստեղծագործական և անձնական վայրիվերումներով 2014-նը շատ չի տարբերվում իմ նախորդ տարիներից: Ունեցել ենք 5 նոր հետաքրքիր ներկայացում, որոնցից 4-ը հրավիրված բեմադրիչներ են հեղինակել: Ես հունվարին հանձնել եմ «Կարինեն», Վահե Շահվերդյանը` «Տիկին մինիստրուհին», Սարգսյան Անուշը` «4 պատճառ ամուսնության համար», Թամար Հովհաննիսյանը` իր «Վերջին կանգառը» պիեսը, Կարապետ Բալյանը` «Հեքիաթ 4 նմանակ եղբայրների մասին»: Բեմադրիչների այս առատությունը ինձ հնարավորություն է տալիս` շատ դերասանների տեսնելու ուրիշ, ինձ համար անհայտ, նոր տեսանկյունից: Դերասաններն իրենք էլ նորովի դրսևորվելու ստեղծագործական դաշտ են գտնում: Հիմա ես զուգահեռ փորձում եմ Սունդուկյանի «Էլի մեկ զոհը» և Երիցյանի «Ուշ լինի, նուշ լինին»: Հավատարիմ եմ մնում «Ազգային թատրոնը պետք է հենվի ազգային դասական և ժամանակակից դրամատուրգիայի վրա» իմ դավանանքին: Տաղանդավոր դերասանների պակաս չունենք: Ամենահրատապը բեմանկարիչների խնդիրն է, քանի որ Արուտչյանից, Սաֆրոնովից, Սահակյան Գրիշայից, Վահագն Թևանյանից հետո շատ լուրջ դատարկություն է առաջացել: Հիմա մեզ մոտ իրենց առաջին քայլերն են անում Դավիթ Մինասյանի արվեստանոցում կրթված թատրոնը սիրող Տաթևիկն ու Մարիամը, որոնց հետ, կարծում եմ, կարելի է հույսեր կապել` դատելով ցուցահանդեսներում ներկայացրած վառ թատերային աշխատանքներից:
2015-ին, դժբախտաբար, մեր թատրոնն իր տեսակով չէր կարող իր վերաբերմունքն արտահայտել մեր ժողովրդի մեծ վշտի 100-րդ կարևորագույն տարելիցին: Ինքս անձամբ պարտավոր էի, կարող էի օգտակար լինել, բայց, դժբախտաբար, ուրիշ որևէ թատրոնից ինձ առաջարկ չարվեց, մինչդեռ իմ ականջներում են դեռևս Մեծ Եղեռնի ճամփաներով անցած ծնողներիս պատմությունները: Մեզ մնում է բարձրարվեստ մեր ներկայացումներով հավաստել մեր ազգի ներկայիս հոգևոր ներուժի մասին:
Առանձնակի կարևորում եմ թատրոնի հյուրախաղերը: Դրանք թե ներշնչանքի զարմանալի աղբյուր են, թե սթափության ու արժանապատվության: Ես նկատել եմ, որ ուզածդ 5-10 տարվա ներկայացում այդ ընթացքում պրեմիերայի շնչով է անցնում: Կարծես թե իրականանալի են դառնում թբիլիսյան հյուրախաղերը: Հրավեր ունենք ԱՄՆ-ից: Ժամկետներն են ճշտվում: Անպայման կվերականգնենք Ախալցխա, Ախալքալաք հյուրախաղերի բանակցությունները. հայոց լեզուն այնտեղ մեկ անգամ ևս հնչեցնելը, եթե կուզեք, մեր հայրենասիրական պարտքն է նաև: Մենք ինքներս մեզ պիտի լավ ճանաչենք, որպեսզի սիրենք: Մենք մեզ չենք սիրում: Օրվա պատգամը չի փոխվել, ցավոք. «Ճանաչել զիմաստութիւն և զխրատ, իմանալ զբանս հանճարոյ»: Իմ ուսանողներին հաճախ եմ հորդորում կարդալ Աբովյանի «Վերքը», մահվանից առաջ գրված Պետրոս Դուրյանի նամակները` թավջութակի կոնցերտ, ոչ թե գիր-գրականություն: Մենք մեզ մինչև չճանաչենք, մեր աչքը միշտ դուրսը կլինի:
Սև ակնոցները երբեմն-երբեմն պիտի հանել. հեռուստաեթերը հեղեղված է ավտովթարներով ու տարատեսակ հանցագործություններով: Զարմանում եմ` մեր երկրում ոչ մի լավ բան երբեք տեղի չի՞ ունենում: Դժոխքու՞մ ենք ապրում: Հասկանում եմ, որ մենք Դանիայում և Նորվեգիայում չենք ապրում, սոցիալական կնճռոտ խնդիրներ ունենք: Բայց մարդկանց միտքն ու հոգին մշտապես թունավորելով չի թեթևանա, չէ՞, վիճակը: Ընդհակառակը, համատարած ընկճախտ է պատվաստվում: Հաճախ լսում եմ այս կամ այն քաղաքական գործչի կրակոտ ելույթն ու մտածում` արդյոք իր մեղքի բաժինը չի՞ տեսնում պախարակվող երևույթի մեջ: Չէ՞ որ երեկ մի աթոռ էր զբաղեցնում, դրանից առաջ` մեկ ուրիշ... Տագնապում եմ մայրաքաղաքից դուրս գտնվող թատրոնների համար: Կոչ եմ անում բոլոր քաղաքապետներին, մարզպետներին` իմացեք, եթե նույնիսկ մի թատրոն կա ձեր մարզում, այն պիտի լինի մշակույթի սռնի: Հենց նրա շուրջը պիտի հավաքվեն թե´ երաժշտական դպրոցները, թե´ նկարչական, թե´ պարային. ընդհանրապես ամենն, ինչ առնչվում է մշակույթին: Հավատացնում եմ, որ կարող եք օգնել և խնդրում եմ: Զարմանում եմ, որ Էջմիածնում` մեր հոգևոր մայրաքաղաքում, մինչ օրս պրոֆեսիոնալ թատրոն չի բացվում: Վերջ տվեք ինքնագործունեությանը: Ամեն ասպարեզում հենց ինքնագործունեությունը քանդեց մեր տունը: Հրաշալի շենք ունեն: Ի˜նչ դժվար է, ինստիտուտի մի քանի կուրսի շրջանավարտներից ընտրել լավագույններին, մոտ 20 հոգի, մի ավտոբուս տրամադրել, համեստ կենցաղային պայմաններ և նրանց համախոհությամբ մի կարգին թատրոն ստեղծել: Հետո էլ բողոքում են, թե աղանդները եղծում են մեր քրիստոնեական հավատքը: Հենց Մայր տաճարի հովանու ներքո հաստատեք թատրոնը, 3 պիես բեմադրեք, որոնցից երկուսում մեր առաքելական եկեղեցու պատմությունը քարոզվի: Չկա ավելի ներգործուն ազդակ, քան կենդանի թատրոնը:
Հունվարից, առայժմ իմ անցյալ կուրսի շրջանավարտների բեմադրած հատվածներով, մեր թատրոնում փորձելու ենք շրջանառել փոքր դահլիճն էլ: Նրանք համաձայնվել են 1 տարի անվճար փորձաշրջան անցնել: Նախ, մեծ բեմի հերթափոխ կձևավորվի: Հետո ամբողջական պիեսներ էլ, իհարկե, կբեմադրվեն այնտեղ, ազատ բեմահարթակ կլինի, հուսանք, թե ուսանողների, թե վարպետների կամերային ներկայացումների համար:
Այս ամենի իրականացմանը հասնելու համար ինձ հարկավոր է առողջություն և համբերություն, որպեսզի կարողանամ աշխատել: Մեքենա չեմ ուզում, վերարկու ունեմ, կոշիկներ` նույնպես... Ի դեպ, կոշիկների հետ կապված մի շատ լավ պատմություն ունեմ: Միշտ երազում էի, որ այնպիսի կոշիկներ և վերարկու ունենամ, որ խոնավություն չքաշեն, մեկ էլ` սիրած աղջիկ: Այդպես էլ չհաջողվեց դրանք միաժամանակ ունենալ` աղջիկը եղավ, կոշիկներ չունեի, վերարկուն եղավ, աղջիկը չկար... Հիմա էլ եթե հեռանկարում այդ երեքը միասին ունենամ հանկարծ, շատ երջանիկ կլինեմ:
Յուրաքանչյուրը մեզանից, հայ ժողովուրդ, ով եթե գողանում է, եթե խաբում է, եթե ատում է, թող նայի Եղեռնի զոհերի հուշարձանին և ամաչի մեր միլիոնուկես նահատակներից, թող այդ հուշարձանը մեզ համար դառնա Կյանքի, ճշմարիտ ապրելու կամերտոն: