Հարազատներին քոթակելը քրեական չէ
Ընտանիքի անդամներին և փողոցում մարդ ծեծելը, պարզվում է` իրավաբանական տարբեր որակումներ ունեն: Եվ ՌԴ պետդումայի օրակարգ է ընդունվել` մոտ հարազատներին ծեծելը ապաքրեականացնելու օրինագիծը:
Պետդումայի ստորին պալատի ղեկավարությանը մոտ կանգնած աղբյուրը Բի-բի-սին ասել է, որ այդ օրինագիծն ընդունվելու է: Թղթակիցն, իհարկե, չի էլ հարցրել`
- Իսկ եթե քվեարկությունը անհրաժեշտ ձայներ չհավաքի՞:
Դե, խելոք մարդիկ խելոք մարդկանց խելոք հարցեր չեն տալիս. ղեկավարությունը որոշել է, ուրեմն քվեարկությունը կկայանա` անհրաժեշտ տոկոս հավաքելով: Ավելին, տեղեկատու աղբյուրն ասել է նաև`
- Գերագույն դատարանում ցանկանում են այդ կերպ դատարանները բեռնաթափել բազմաքանակ մանր գործերից:
Իհարկե, եթե ընտանեկան քոթակը վնասի ծեծվողի առողջությունը, այդ դեպքում երևույթը կորակվի որպես քրեական: Բայց էականն օրենսդիր մարմնի «բացարձակ անկախությունն» է. օրինագիծն ընդունել-չընդունելու որոշումը կայացվում է քվեարկությունից առաջ: