Ոգեկոչում` Հարժիս գյուղում
Գիտելիքի ու դպրության օրը կրկնակի տոն էր Սյունիքի մարզի Հարժիս գյուղում:
Ազատամարտիկ սակրավոր-հետախույզ Համլետ Մինասյանի անունը կրող դպրոցի բակում տեղադրված անվանի ազատամարտիկի հուշարձանի տեղադրման 20-ամյա հոբելյանն էին նշում:
2011 թվականից լեհ ժողովուրդը և Հայաստանում լեհական հավատարմատարությունը ստանձնել են Սյունիքի մարզի Հարժիս գյուղի Համլետ Մինասյանի անվան միջնակարգ դպրոցի վերանորոգման աշխատանքները` փուլ առ փուլ հասցնելով վերջնական ավարտին:
Միջոցառմանը ներկա էին ՀՀ-ում Լեհաստանի արտակարգ ու լիազոր դեսպան Զդիսլավ Ռադզինսկին, նրա տեղակալը, Սյունիքի փոխմարզպետ Արա Դոլունցը, Հարժիս գյուղի գյուղապետ Սուրիկ Հարությունյանը և այլք:
Հյուրերն ու միջոցառման կազմակերպիչները հանդիսավոր կերպով կտրեցին դպրոցի կարմիր ժապավենը` ծանոթանալով մինչ օրս կատարված աշխատանքներին:
Ջերմորեն ողջունելով ներկաներին, դպրոցի տնօրեն Վոլոդյա Հովսեփյանը շնորհակալագրեր հանձնեց ՀՀ-ում Լեհաստանի արտակարգ ու լիազոր դեսպանին, մարզպետին ու զոհված ազատամարտիկ Հ. Մինասյանի ծնողներին, ինչպես նաև գովասանագրեր հանձնեց 2011-12 ուսումնական տարվա գերազանցիկ աշակերտներին:
Հուզիչ ու անկեղծ էր Լալազար Մինասյանի` Համլետ Մինասյանի հոր խոսքը:
ՀՀ-ում Լեհաստանի արտակարգ ու լիազոր դեսպան Զդիսլավ Ռադզինսկին, փոխմարզպետ Ա.Դոլունցը, դպրոցի վաստակավոր ուսուցչուհի Ա. Մանուչյանը, գյուղապետ Ս. Հարությունյանը ևս նորոգ դպրոցում բարձր առաջադիմություն մաղթեցին աշակերտներին: Իսկ օտարերկրացի հյուրերը հետաքրքրությամբ լսեցին զոհված ազատամարտիկ Համլետի մոր` Մառլենա Մինասյանի խոսքը հերոս որդու անցած ուղու մասին:
Իսկապես` ոչինչ չի մոռացվում ու ոչ ոք չի մոռացվում. սա նաև հարժիսցիների կարգախոսն է: