Սոցհարցումները պատվերով գործառույթ է
Մեր զրուցակիցն է Հայաստանի Առաջադիմական միացյալ կոմկուսի նախագահ Վազգեն ՍԱՖԱՐՅԱՆԸ
- Ինչպե՞ս եք վերաբերվում Ընտրությունների հանրային վերահսկողության միասնական ընտրական շտաբի ստեղծման գաղափարին:
- Գաղափարին լավ եմ վերաբերվում, բայց վատ եմ վերաբերվում կազմակերպիչների գործառույթին: Եթե նման բան կար, ուրեմն թող բարի լինեին` հրավիրեին, մենք էլ մասնակցեինք այդ քննարկմանը:
- Նեղացա՞ծ եք..
- Նեղացածի խնդիր չի, ումի՞ց նեղանաս. նեղանում են նրանից, ումից կարելի է նեղանալ, բայց նրանցից մենք նեղանալու խնդիր չունենք:
- Նկատի ունեք այդ ուժերի՞ն:
- Ավելի շուտ` կազմակերպչին: Եթե ընտրություններին մասնակցում են ութ կուսակցություն և մեկ դաշինք, ուրեմն բարի եղիր` բոլորին հրավիրել:
- Կարծում եք` Ձեր ուժերը թերագնահատե՞լ են:
- Բայց ո՞վ է որոշել կամ ո՞վ է իրենց ասել, որ իրենք պե´տք է պառլամենտ անցնեն, մյուսները` ոչ: Ի վերջո, ժողովուրդը պետք է դա ասի, չէ՞: Իսկ ժողովուրդը նման գործառույթներն էլ է տեսնում ու գնահատում:
- Այսինքն` շտաբի գործունեությանը թերահավատորե՞ն եք մոտենում:
- Կարծում եմ, որ այդ գործառույթը ժողովրդի կողմից լավ չի ընկալվի: Նախ` որովհետև իրենք բոլորին հավասար պայմաններում չեն դիտում, իրենք իրենց արտոնյալ վիճակում են պատկերացնում: Իսկ ընտրությունից առաջ որևէ մեկն իրեն արտոնյալ վիճակում չպետք է պատկերացնի, որովհետև ընտրության ելքը որոշում է ժողովուրդը:
- Այդ փաստաթուղթն արդեն ուղարկվե՞լ է Ձեզ, ստորագրելո՞ւ եք դրա տակ...
- Որ իրենք ինչ-որ բան որոշեն, ու մենք էլ դրա տակ ստորագրե՞նք... Կարծում եմ` դա իրենց էթիկայի որոշակի պակասի մասին է խոսում: Մեր ստորագրությունը դրա տակ դնելուց առաջ մենք դեռ պետք է իրենց ասենք, որ դուք ճիշտ չեք մոտեցել խնդրին: Եվ միայն այն բանից հետո, երբ իրենք մեզ որոշակի բացատրություններ կներկայացնեն, թե ինչու են այդպես վարվել, մենք որոշում կընդունենք:
- Ինչպե՞ս եք տրամադրված առաջիկա ընտրություններին:
- Մենք վստահ ենք, որ ժողովուրդն այլևս սխալվելու իրավունք չունի. վերջին 20 տարիներին նա շատ է սխալվել` շատ սկզբունքային հարցերի արմատական լուծումներ առաջարկողներին ժամանակ առ ժամանակ չվստահելով:
- Չե՞ք կոտրվում` իմանալով հանդերձ, թե ո՞ւմ դեմ եք պայքարելու:
- Մենք բոլորովին չենք վախենում և մեր հնարավորությունները բավական բարձր ենք գնահատում: Ես մի առիթով էլ ասել եմ, որ մենք առնվազն 10 տոկոսից ավելի ձայն կհավաքենք:
- Տարբեր սոցիոլոգներ Ձեզ «չանցողիկների» մեջ են ներկայացնում:
- Ես, բնականաբար, չեմ հավատում նրանց: Այդպիսի սոցիոլոգիական հարցումները, այսպես կոչված` անցողիկների դրածոներն են կազմում: Դա պատվերով գործառույթ է` ով վճարում է, նրա օգտին էլ գրում են այդ տոկոսները: Ժողովրդի´ն պետք է հարցնել, իսկ ժողովուրդն իր կարծիքը կասի ընտրությունների ժամանակ:
- Բայց ընտրությունները կարտացոլե՞ն ժողովրդի կարծիքը:
- Եթե պետք է ժողովուրդն ընտրի մի կուսակցության, որը պառլամենտում չի հայտնվի, մենք արդեն խնդիր կունենանք քաղաքացիական հասարակության կայացման առումով:
- Դուք պատրա՞ստ եք այդ պարագայում ինչ-որ զանգված դուրս բերել փողոց:
- Նրանք, ովքեր մեզ ձայն կտան, մենք կոչ կանենք դուրս գալ փողոց և իրենց բողոքի ձայնն արտահայտել: Եթե հրապարակում կհավաքվի 50 հազար ու ավելի մարդ, և մեր ձայները դրան համարժեք չեն լինի, ապա մենք կըմբոստանանք: